對於曾蔭權連串貪腐醜聞，大家有乜感想冇呢？最直接嘅感想如無意外係嬲到震，香港賴以自傲嘅廉潔同法治居然衰喺頭號大當家一對黑手，「香港第一貪官」搞到人人蒙羞。另一種感想大概係，好彩有作為第四權嘅傳媒發揮監察作用咋，尤其係東方報業集團連日獨家報道窮追猛打，否則蠱惑成性嘅煲呔曾隨時逍遙法外，廉政專員公署都蒙在鼓裏。
即係咁，三權分立互相制衡都有搔不到癢處嘅時候，好似立法會咁吖，開大會公審又點呢？議員要求貪婪特首落台都冇用，舔盡便宜嘅「曾濫權」繼續好官我自為之，臉皮幾尺厚賴死唔走，砌詞狡辯話唔可以隨便離開崗位喎。就喺呢一個時候，第四權嘅傳媒顯得特別重要，為公眾提供知情權打倒貪官，激發遊行示威喝令禮賓府主人滾蛋。
講到呢度，功夫茶問一問大家，知唔知道政府點解咁鍾意扼殺新聞自由？答案好明顯啦，扼殺新聞自由就可以封鎖消息，封鎖消息就可以黑箱作業，黑箱作業就可以為所欲為，「曾小人」日日夜夜傍住富豪貪威識食都冇人知，從而避開鵝頸橋神婆打小人嘅驅魔拖鞋。
嗱嗱嗱，扼殺新聞自由又嚟料，政府新聞處出稿話喎：「由於進行系統維修，政府新聞處新聞發布系統於三月四日上午一時四十分起停止運作。」
新聞發布系統停止運作好大鑊㗎，新聞工作者等於封眼蒙耳又盲又聾。傳媒以往可以透過「聽機」知道警方、消防同救護處理突發事件嘅消息，不過自從相關部門先後轉用數碼通訊，聽機已經冇可能，政府變相強制傳媒「熄機」。於是乎咯喎，記者得悉突發事件嘅唯一渠道係新聞處。喂，新聞處維修還維修吖，冇後備系統嘅咩？吹得佢唔脹，竟然真係冇。
對於新聞處忽然「停機」，浸會大學新聞系助理教授杜耀明就話嘞，政府今次做法擺明係試探傳媒嘅反應：「官員都唔會話系統暫停，而唔將消息話畀特首聽啦！」杜耀明認為政府不負責任，傳媒有權去申訴專員公署投訴新聞處失職。香港城市大學專業進修學院學術統籌宋立功同樣批評，停機嚴重剝削市民知情權，令市民無從監察政府。
如果你從陰謀論出發，所謂系統維修只不過係藉口，情況好比賊佬入屋偷竊，扮成維修工人「熄燈」，咁咪可以大肆搜掠囉。
講來講去，目無法紀嘅曾蔭權政府愈來愈隻手遮天，簡直令到第四權嘅從業員忍無可忍。既然係咁，功夫茶更加要呼籲市民據理力爭，示威遊行踢煲呔落台之餘，亦要眾志成城捍衞新聞自由，不容知情權殺完再殺，否則貪贓枉法都冇人知！