香港公僕清廉奉公嘅形象，被「貪曾」全方位貪腐一鋪清袋，十六萬公務員唔火滾「抗曾」就勢係假！為保港廉潔形象，昨日六千多人手起鞋落齊打呢個「貪曾」小人，倒曾運動聲勢澎湃！
都說性格決定命運，縮骨治港嘅煲呔曾，「福為民開」見鬼去，以權謀私繼續來，舔盡份工到最後一秒才真。上台以來最叻做「離岸特首」，出訪逍遙遊至今五十四次，臨收工更驚死蝕底，本年度外訪已花近四百三十萬元，呢隻大蝗蟲，會變賣「私藏」紅酒做「善事」，講出都六月飛霜、七月降雪啦！反正用槍指住我個頭我都唔會信！
一個極貪婪而居高位嘅人形物體，無疑是播其惡於眾也！《左傳》有句「我以不貪為寶，爾以玉為寶」，說的是宋國大夫子罕，他為政清廉，注重個人道德行為的修養。一日有獻玉者對他叩頭說：「我帶着呢塊玉，到哪裏都不安全，希望你收下。」子罕聽了，便請玉工雕琢了這塊璞玉，然後賣出，再將所得的錢給了獻玉者，讓他成了富翁，最後還送他返鄉里。子罕沒有自命清高，也沒有教訓獻玉者，他明確表達自己所看重的並非物質上的富有，而是品格上的高尚情操。
故事的主角——獻玉者若然不是遇上子罕而是碰上「香江和珅」，最好的結局不過是那塊美玉變成「私藏美玉」，最後拍賣了變成「慈善捐款」！獻玉者鬱死街頭！遇官不淑，原來慘過搵錯老婆！搵錯老婆，最多搵間六千呎「廉租禮賓府」畀佢放吓雜物，唔使死人咁悲壯。