政情：白姐姐「假傳聖旨」撐阿Paul
泛民政黨對彈劾煲呔曾抱觀望態度，主張先以特權法徹查事件，相反旅遊界立法會議員謝偉俊（Paul）就堅持要啟動彈劾機制，誓要對煲呔曾嘅政治道德失誤作出制裁，尋日佢再次出現《城市論壇》，同人民力量陳偉業一唱一和力撐彈劾動議。阿Paul嘅最堅實支持者喺論壇上出口相助，幫唔幫忙到就唔知喇。
阿Paul一句「彈劾特首係最有效表達市民對特首道德政治上不滿嘅方法」，即博得場內掌聲如雷，不過，場外話佢做騷嘅指罵亦此起彼落。白姐姐尋日見阿Paul講到把聲都震晒，情急起來忽然舉手發言，跟住就好似上咗身咁，即場表演相聲口技，話要幫「阿爺」、「鄧伯伯」同「江伯伯」三位老人家傳話，大意話要將煲呔曾「攆下來」，不過觀眾就好似唔係太受落，反而話白姐姐「假傳聖旨」，而台上嘅阿Paul亦都受寵若驚，面有難色。愛你變成害你，咪就係咁解囉。