至於點樣維護社會和諧穩定？習主席就話，政協委員要積極推動社會各方面顧全大局、理性溝通，進一步促進包容共濟、和諧穩定，仲有一句係「兄弟同心，其利斷金」。對於習主席嘅發言，唐營同梁營都各自解讀。
好似率先同習主席握手嘅政協委員劉夢熊，就將「兄弟同心、其利斷金」解讀成中央希望某啲人放棄自己利益，顧全大局，不過佢唔敢講中央要邊個放棄。而唐營堅實支持者政協常委陳永棋就話，只係劉夢熊提早霸位，做埋啲小動作，先至可以第一個握手，唔代表中央挺梁。佢仲話習近平有講穩中求進，正正係唐英年政綱一部分，兩人理念好一致。不過被民建聯主席譚耀宗踢爆，話中央講「穩中求進」講咗好耐，唔係咩新意。