政情：車公批中議員神鬼不分
「何為邪鬼何為神，神鬼如何兩不分。但管信邪修正外，何愁天地不知聞。」車公年初賜予香港嘅靈籤，果然一語成讖。煲呔曾犯下「曾貪心」及「曾濫權」兩大證據確鑿滔天大罪，但一班立法會議員竟然輕易放過，否決動用「尚方寶劍」特權法徹查呢個香港第一貪官，實在令市民側目。好彩市民眼睛係雪亮嘅，邊個係人邊個係鬼，一眼就睇得出，今年九月立法會選舉，市民一定會好好利用手上神聖選票，去懲罰嗰啲唔係「人」嘅議員！
香港地話就話三權分立，但今次盡顯立法機關嘅無能。就算明知煲呔曾貪盡海陸空、豪飲豪食省港澳，立法機構居然無晒辦法，一班建制派工商界議員嘅立場好有問題，好似工業界林大輝、商界林健鋒、地產及建造界石禮謙咁，呢班保守嘅議員向來都唔贊成用特權法，但偏偏對住梁振英就喊打喊殺，點都要投票支持通過特權法，徹查梁振英嘅西九風波。不過一講到要查煲呔曾貪贓枉法一事，佢哋就即刻收晒聲，話要交畀廉政公署查，立法會唔方便介入喎。一時就義正詞嚴話要徹查，一時就滿口仁義道德，咁擺明係雙重標準啦。
搵廉署擋箭
同樣口硬、腳仔軟嘅仲有民建聯同工聯會，兩個黨早排仲大大聲話要煲呔曾解釋清楚，否則市民啖氣好難吞得落，又話作為特首應該畀人有更高道德標準。但點知煲呔曾扮可憐道完歉，兩大黨就草草收貨，拒絕再追殺煲呔曾。最衰嘅係佢哋又拎廉署出嚟做擋箭牌，話如果立法會又查，廉署又查，會造成混亂喎。真係神又係佢，鬼又係佢，呢啲咪係「神鬼如何兩不分」囉，今次車公又批中，唔到你唔信！
依家議會充斥住呢班牛鬼蛇神，簡直令到成個立法會都烏煙瘴氣。不過好彩仲有幾個月就到立法會選舉，邊啲議員係講一套做一套，人前大大聲、人後面都青，心水清嘅市民一定心中有數，到時市民必用選票踢走呢班隨風擺柳嘅舉手機器，令立法會唔會有咁多牛鬼蛇神！雖然下屆立法會仲有一半係功能組別，但只要市民發揮手上一票，邊個係人邊個係鬼，即刻就現晒形喇。