中環出更：劉詩昆陪孫穎 掃300萬鑽錶
鑽錶，無女人抵得住誘惑。鋼琴大師劉詩昆愛徒孫穎都唔例外。孫穎近年投資物業有道，早已進身億萬富婆。日前行經中環太子大廈一間錶行，睇見價值近三百萬元鑽錶，唔使廿分鐘就扑錘。呢個價，足夠喺新界區買層細單位上車，認真恨死「缺宅男女」。
全球兩隻 鑲共30卡巨鑽
孫穎睇名錶，劉老師都陪伴左右，盡顯風度。時值下午兩點幾，孫穎一入店內，即被一隻鑲滿巨鑽嘅名錶吸引，毫不猶豫試戴上手，鑽光四射，睇見都為之心動，孫穎請教老師意見後，認為買得過，一於扑錘。隻錶夠矜貴，全球只有兩隻，香港更只有一隻。隻錶造工精巧，合共鑲上三十卡巨鑽，粒粒潔淨無瑕，戴上佢，直頭好似放咗盞閃光燈喺身邊。
買得咁豪，孫穎無帶保鏢，只吩咐司機喺店外等候。新錶出爐，第一站係去美國。孫穎將出席美國一位殿堂級大師舉行嘅盛大晚宴，戴完呢次，佢會將錶放喺劉老師同佢一齊籌劃嘅私人藝術館內，供好友欣賞。
卓妮