富豪富豪，煲呔煲呔，富豪同煲呔曾蔭權家陣變咗利益共同體，名副其實同搭一條船，間唔時仲同搭私人飛機添，「曾商勾結」引發一場反貪風暴。比較有趣嘅係，部分富豪對於自己被稱作富豪表示反感喎，幾鬼死得意呀！
其實呢，香港到底有幾多富豪？如果你將百萬富翁歸類為富豪，答案係五十二萬七千人。
所謂百萬富翁，即係擁有流動資產超過一百萬港元嘅有錢一族。花旗銀行公布調查報告顯示，百萬富翁人數按年減少百分之五點六，即係少咗三萬人，平均總資產亦由九百八十萬降至九百三十萬元，主要由於去年投資市場表現欠佳，其中恒指按年跌約百分之二十五，走勢符合市場表現。
花旗銀行嘅調查亦顯示，中西區及南區百萬富翁人數減少，九龍城及觀塘區百萬富翁人數升幅最大，可能受政府城市規劃及地產發展影響。百萬富翁嘅財路點解會亨通嘅呢？四成百萬富翁增加財富嘅原因，首先在於投資，其次買賣物業。
香港嘅百萬富翁人數雖然少咗三萬，不過仍然超過五十萬，到底係好事定係壞事？計功夫茶話齋，見仁見智睇你點睇啦，如果其餘六百五十萬香港人都擁有相當多嘅財富，百萬富翁係多係少都冇乜問題，之但係如果窮等人家多不勝數，百萬富翁嘅存在反而令人十分傷感。原因好簡單，貧富懸殊製造社會矛盾吖嘛，好容易就會產生仇富心態。
正所謂不患寡而患不均，唔公平嘅貧富懸殊往往係社會不穩定因素。就好似曾蔭權官商勾結咁吖，如果人人都可以學似曾蔭權咁，係咁意掟低五百蚊就可以享用富豪嘅超級遊艇，相信冇人覺得有乜唔妥，煲呔亦都唔會淪為過街老鼠。家陣唔係喎，只有一個高高在上嘅「香港和曾」有權享用奢華設施，付出粉絲價錢就可以食到上等魚翅，呢一種不公平現象就激起莫大民憤嘞。
百萬富翁不怕多，只怕窮人更坎坷，點解咁講呢？喂，百萬富翁財路亨通，話就話有賴投資同買賣物業，問題係不知幾多有錢一族為富不仁，靠嘅係吸啜民脂民膏。試想想，假如官商勾結造成市場壟斷，邊個係得益者？邊個係受害者？唔使講啦，富者愈富，貧者愈貧，咁咪即係窮人更坎坷囉！
所以話啫，香港真係有必要重回廉潔正軌，絕對唔可以容忍貪腐存在。如果百萬富翁係透過光明正大嘅正常途徑求財致富，功夫茶畀隻拇指你；如果有錢一族係透過邋遢手段賺盡不義之財，功夫茶畀隻中指你。
講到尾，香港唔可以有貪官同奸商，曾商勾結一定要嚴正法辦！