雲開見山高，木落知風勁。《東方日報》、《太陽報》連日來紅爆全城，獨家猛料、圖文並茂，睇到個個眉開眼笑（更有可能義憤填膺），老朽晨早展報讀新聞，見到「正論」條題都要先笑三聲：「香港精神大滑坡，官商勾結狡辯多」！
阿哥，鐵證如山，有相為證，咁都仲有得抵賴？煲呔曾嘅操守和誠信已然破產，接受富豪款待，瓜田李下不避嫌，視「廉潔奉公」如無物，點辯都死！
有啲嘢「狡辯多」只會變成「出醜多」，好似前美國總統克林頓與萊溫斯基的「拉鏈門事件」。萊溫斯基承認，她在做實習生期間曾數度為克林頓口交。萊溫斯基並有一件藍裙為證，上面遺留克林頓總統的精液。
律師出身的克林頓自有歪理應對，他在記者招供會上稱，自己並沒有作偽證，因為性關係是指性交，而口交不算性交。嘻！咁都得！
呢呢呢，內地啲狗官就至叻「狡辯多」，上年七月貴州一名女教師酒後被官員強姦，證據確鑿，當局竟表示「戴安全套不算強姦」，檢方甚至拒絕對罪嫌實施逮捕。評論指「戴套強姦不算強姦，中國的法律卻慘遭強姦。」
煲呔曾大小通吃，與富商的糾結，老朽一把年紀睇到眼花，有半億「曾大屋」，連跑步機都要「借」用七年，慳家成咁，唔發達冇天理也！咁講喇，煲呔曾講多句「問心無愧」，佢毋須唱卡拉OK都會落雪。七月未下台，香港六月已飛霜！