政情：立會種大芭蕉吸毒氣？
早排立法會新大樓繼發現致命退伍軍人桿菌之後，又被驗出空氣中總揮發性有機化合物（TVOC）含量超晒標，淪為惡菌同毒氣溫床，搞到人心惶惶。立法會秘書處尋日就發信畀各議員，話大樓部分公用地方已經栽種咗大芭蕉同虎尾蘭，又畀議員一個星期時間，提供種植乜嘢植物、數量及位置等意見，唔知係咪用嚟吸走啲毒氣，等大家開會時安心啲呢？
虎尾蘭確係有淨化空氣嘅功能，可以吸收空氣中嘅苯、二氧化碳同工業常用溶劑三氯乙烯，喺日間釋出氧氣，可謂天然嘅淨化器。不過大芭蕉吸毒嘅作用似乎唔多明顯，多數用於烹飪，芭蕉葉仲可以用嚟包裹食物。
如果栽種植物嘅目的真係想淨化空氣，咁倒不如種吸毒力超強嘅「白鶴芋」同「火鶴花」，即係常見嘅白掌同紅掌。
唔止可以分解甲醛、甲苯等毒氣，有助淨化家具釋出嘅有害物質，顏色又鮮艷，議員同埋訪客見到都醒神啲啦。