政情：潘佩璆談議席留後路
立法會選舉九月舉行，工聯會銳意喺港島區取得「零的突破」，眾所周知勞工界議員潘佩璆加入立法會後三年多，知名度一直停滯不前，所以工聯會早前把心一橫，決定將出身港島嘅王國興由新西「空降」返娘家，準備由佢肩負打頭陣搶灘嘅重任。潘醫生又點？有地區人士話其實王國興同潘醫生成日都有影皆雙，好似保留新光戲院一役，兩人仲一齊着粵劇戲服上街添，睇得出潘醫生仲好有參選戰意咁話。
我哋早前問過潘醫生會否繼續參選立法會，潘醫生冇一口斷然說不，只係話一切留待工聯會決定，潘醫生嘅口氣好似比之前有些少鬆動，唔知係咪為日後有機會披甲上陣留番條後路呢？
潘醫生講到個乖孫就特別開心，原來個孫唔經唔覺已經十七個月大，除咗牙牙學語外，亦識得唔少唐詩，例如潘醫生佢哋一講「床前明月」，乖孫就自然識接上講個「光」字，真係精乖，難怪潘醫生每次提起佢時都笑容滿面喇！