政情：羅寶文為揸Fit失柔情
傑出青年協會尋日舉行頒獎禮，邀請咗幾位歷屆傑青同幾百個得獎學生分享做領袖嘅心得。○七年獲選為傑青嘅羅寶文話，做領袖要有好嘅EQ，即情緒智商，而面對逆境（AQ）、道德（MQ）、人際關係（SQ）嘅能耐都唔可以少，最後重要有IQ，不過呢個唔單止係智商嘅IQ，而係要有內省能力。
羅寶文話，自己從小就有捨己為人嘅使命感，成日都幻想做英雄，幫其他人擋槍捱子彈，真係睇唔出。羅寶文又引用哲學家尼采嘅名言「He who has a why to live can bear almost any how」，勉勵得獎同學只要有目標，就自然能迎難而上，而佢亦係憑呢個信念，試過同一時間做十三個學會嘅會長。
羅寶文話，做得領袖就預咗要有所犧牲，而佢嘅犧牲就係唔係好識依賴別人。
仲係單身嘅羅寶文話，由於成日都要撐起大場面，搞到佢無咗女性柔情「扮唔識」嘅一面喎。