政情：火燒後欄貪曾搵窿捐
仲有四個月，煲呔曾任期就屆滿。早喺兩、三年前，煲呔曾已經同老婆部署定退休嘅生活，佢計劃唔做特首之後搬去深圳延續佢皇帝一樣嘅生活，九千呎地方印印腳，仲話可以眺望香港添。點知原來真實情況同佢嘅想像有好大落差，因為佢唔安分守己，搭豪華遊艇、坐私人飛機、平租深圳「禮賓府」，經我哋踢爆後，佢周身着火，仲燒完前門燒後欄，七‧一後要到處撲火，好唔得閒。
煲呔曾貪盡海陸空，仲想任期屆滿後退休歎世界，真係發夢都冇咁早。唔好話市民好氣憤，班立法會議員都唔會放過佢。議員依家磨拳擦掌，歷史上首次要開啟彈劾特首嘅機制，如果成功，終審法院首席法官會成立一個委員會查佢。唔單止係咁，廉政公署喺眾目睽睽下亦唔敢怠慢，聞說已經開「快勞」查佢有冇貪污，仲連由咩職級官員負責徹查都已經安排好，睇落都似層層。到時煲呔曾要接受呢度嗰度嘅調查，實搞足好多個月，分分鐘要坐監收場。到時佢周身都唔得閒，仲點返去深圳「禮賓府」歎世界？
再講吖，就算畀煲呔曾返到去住「禮賓府」又點？咪又係坐唔安食唔樂。全世界都知佢退休返深圳住，到時一定又會有唔少傳媒去佢屋企樓下追訪佢，分分鐘連樓都落唔到啦。萬一嗰度啲居民投訴太多傳媒，要勞煩到啲保安員出馬，搞到勞師動眾，又畀當地居民鬧佢擾民，咁就真係搞到深港兩地都對佢神憎鬼厭。
近兩日就有傳話煲呔曾打算放棄租住「禮賓府」，再另覓其他地方落腳，其實佢嘅「禮賓府」已經曝晒光，點都住唔到落去㗎嘞。
唔租撻訂要賠錢？
之不過煲呔曾要解約都唔係咁易甩身，如果好似雙方所講簽咗三年約，佢最後唔租撻訂，可能都要賠一筆，佢咁一毛不拔，一定由個心赤出嚟。總之佢任期屆滿之後，至係故事嘅開始。