經過東方報業集團鍥而不捨連日揭發，盡忠職守嘅記者日以繼夜窮追猛打，曾蔭權嘅真面目終於大白於天下。原來呢一個自命飲香港水、流香港血嘅香港仔果然蠱惑成性，勾結富商接受奢華款待吃喝玩樂居然仲夠膽死話「問心無愧」。
官商勾結有乜嘢問題呢？問題大咯，淨係一個油魔肆虐已經令人痛心疾首，甚至可以話痛心特首，事關舔到盡嘅曾特首帶頭教壞細路。
油魔之所以係油魔，講嘅係不受控制嘅加價行為。呢嗱嗱嗱，機電工程署冇耐之前再次宣布，容許專用氣站三月一日起調高車用石油氣零售價，令到的士同小巴業界成本大增。業界人士就話嘞，今年頭兩個月期間，專用氣站石油氣零售價由一月每公升四元六毫九，大幅增加至下月五元七毫二，升幅超過兩成，遠高於去年全年綜合消費物價指數升幅百分之五，對的士同小巴司機構成沉重負擔。
既然油魔肆虐，司機大佬當然群起抗爭啦。抗爭計劃係咁嘅，三月一日星期四發動二百架的士同十架小巴圍繞新政府總部遊行示威，估計加上自發支持嘅司機，遊行車隊將會有一千架。
至於業界嘅訴求咯喎，包括要求政府批准收取燃料附加費，即時檢討現行專用氣站定價方式，取消營辦商得到豁免地價安排，以及增加氣站數目。工會已經準備去信運輸署及環境局要求安排會議商討，並且向特首遞交請願信。
簡單咁講，司機大佬不滿政府偏幫大財團，導致石油氣價格居高不下。
如果以前有人話政府偏幫大財團，信嘅人未必會咁多，家陣經過愈揭愈黑嘅「曾濫權事件」，功夫茶敢講，唔信嘅人先至未必會咁多。喂，身為特首都可以群埋富商搭私人飛機周遊列國，去深圳搵樓退休又可以入住免費送裝修嘅「超級豪華廉租屋」，令人懷疑千絲萬縷嘅關係構成利益輸送，大財團受到關照有乜咁出奇呢？畢竟特首係由小圈子選出嚟嘅，而小圈子嘅構成部分就係富可敵國嘅有錢人，以選票換鈔票並非天方夜譚。
講到偏幫大財團，最明顯嘅係政府一口咬定油魔冇壟斷市場。大家都知啦，幾間油公司最鍾意同步大幅加價或者同步輕微減價，加得又快，減得又慢，環境局局長邱騰華竟然認為冇問題，不存在聯手操控價格咁話喎。
所以計功夫茶話齋，與其聲討油魔，不如打倒貪腐，最具代表性嘅打倒人物當然係貪威識食嘅曾蔭權。即係咁，如果全民一心倒曾成功，最低限度收到殺一儆百嘅阻嚇作用，官商勾結都唔會咁明目張膽啦，吓話！