煲呔曾衰收尾，睇來已成定局，貪腐醜聞愈爆愈多，臭屎密冚，一時都搵唔到咁多蓋架！
廉租「禮賓府」呢單，無論點講都難令人置信佢無「曾商勾結」，三歲細路，即使飲蒙牛奶粉都識計喇！有乜理由世上有咁好嘅「筍盤」，裝修三百萬，三年租二百四十萬，裝修貴過租金，唔通麵粉真係貴過麵包？家陣係反智世界？
有啲嘢係日常經驗都能夠判斷到嘅，我哋叫佢做「常識」，「曾大屋」明顯送豪裝，你話唔係「曾商勾結」，除了自欺之外，更係反常識。
呢個世界，最傷人自尊嘅莫過於畀人噴一句：「連咁淺嘅常識都唔識，你傻架？」
之不過，歷史話畀大家知，反常識經常發生，好似光緒年間被認為是清廷學識最淵博嘅徐桐，在義和團爆發之後，對義和團所玩的江湖把戲「刀槍不入」、「靈魂不死」信到十足，徐桐以一種自欺欺人嘅方式勸說決策者，讓整個國家加入一場鬧哄哄的鬧劇，將原已岌岌可危的清王朝推向了崩潰的邊緣！
煲呔曾醜聞多到黃河水都洗唔清，點辯解都難釋香港大多數市民疑慮；佢深陷「身份危機」，無信無恥，無資格再做香港人嘅特首。老朽只能嘆一句：在常識上跌倒，是權力耐不住寂寞，更是一貪再貪促成千古恨！
「香港陳水扁」下台吧！再厚顏強辯「問心無愧」，唔使等到「七一」，你這個爵士只會變過街老鼠！