煲呔曾貪盡富豪提供嘅海陸空款待，結果變成過街老鼠，人人喊打。佢連日對住追訪嘅傳媒口黑面黑，甚至「怒睥」記者，尋日知道避無可避，死死地氣上電台解畫。不過，煲呔曾對傳媒嘅態度完全唔同晒，話連日報道令佢明白市民嘅期望喎，扮到懶係好口咁，同之前比較，簡直係一啖沙糖一啖屎，佢之前副不瞅不睬嘅惡形惡相嘴臉，相信傳媒同市民會記得一清二楚。
