政情：梁美芬那些年好惹火
電台節目「舊日的足跡」向來係名人抒發情感嘅平台，尋日立法會議員梁美芬（鼠王芬）上去真情剖白，話以前個年代重男輕女，由細到大都無人教佢做淑女嘅儀態，但父母嘅放手反而造就佢變成「惹火芬」。佢話自己一向好反叛，人哋話新年唔可以洗頭，佢就偏偏洗濕個頭去拜年同人作對，到入大學更由「反叛芬」變成憤世嫉俗嘅「惹火芬」，一半時間都在寫大字報。
父母嘅放手亦令鼠王芬明白要畀小朋友自由發展，令佢今日可以成為一個「放任媽媽」。原來佢兩個囝囝都係好含蓄嘅年輕人，有一次仲問佢：「媽咪，你以前未做立法會議員時好醒o架，做咗之後蠢呀！」「放任芬」甜絲絲話，可見囝囝係幾關心佢喎，仲話甘願做囝囝嘅發洩對象喎！原來畀囝囝笑自己蠢都可以咁開心。事實證明，每對母子都有獨特增進感情嘅方式。