一句「你有壓力，我有壓力！」而聲名大噪嘅「巴士阿叔」陳乙東，過去曾經參加過特首選舉，但最終因提名唔夠，閘都入唔到。不過，巴士阿叔尋日又話參選，佢嘅政綱仲講明當選後每人派四十萬元喎。無見一排嘅巴士阿叔，尋日擺咗條短片上網，聲稱已獲建制派三大政黨支持做佢內閣，分別係民建聯、自由黨同新民黨，講到似層層。
巴士阿叔除咗疑似有強大政黨做後盾，亦有好強嘅治港理念。佢話要全港滅貧，唯一方法係效法澳門嘅現金分享計劃，而且規模要做得更大，建議每人派四十萬元，分四年領取，等香港人可以做吓小生意，同屋企人去吓旅行咁，唔使成日掛住返工，咁樣港人先可以成為最幸福嘅市民喎。
屈指一算，香港有七百萬人，如果向每人派四十萬元，即合共要派二萬八千億元！如果佢真係做到特首，睇怕納稅嘅市民要申請移民先至得喇。