政情：阿涂晚晚同BB讀聖經
唔經唔覺，立法會議員涂謹申個囝囝已經有三個月大，相信佢湊仔亦都上晒手，尋日佢就去一個BB購物節做比賽評判，仲上台同其他爸爸分享為父心得添。正當阿涂忙緊嘅時候，佢太太阿Sue就努力喺BB展掃貨，各有各忙。
阿涂好開心話，依家教緊BB學轉身，睇吓佢啲手手腳腳係咪真係咁靈活，又話BB飲奶成日都飲得好急，所以老婆餵奶時會同佢講叫佢慢慢飲，點知BB好似真係識聽咁，一聽到媽媽咁講就會飲得慢啲。唔單止咁，BB早上醒後都唔會扭計，反而會自己玩吓玩具、吮吓手指咁，認真聽話。
阿涂仲講笑，話如果遲啲有議員辦事處開幕，佢會帶埋BB去湊吓熱鬧，順便上吓公民教育堂喎，而佢每晚亦會同BB講聖經故事。咁細個就催谷到咁，莫非阿涂想BB繼承佢嘅衣鉢，做律師同立法會議員？