政情：秋生愛「狼」才寸爆唐豬
特首候選人梁振英（CY）尋日喺中環搞咗個新書簽名會，本書由多位支持者共同撰寫，最特別係搵到大佢五年嘅家姐梁桂香出手，回憶兩姊弟兒時嘅點滴，而「影帝」黃秋生亦應邀到場打氣，秋生出口大讚CY外，仲寸爆另一特首候選人唐英年（唐唐）唔適合做特首。
秋生尋日大讚CY有義氣、沉穩踏實、思路清晰有口才，但佢今次出席只係撐本書喎。問佢覺唔覺CY似「狼」時，秋生即時話：「係就好囉，你鍾意一隻狼、一隻虎做領導人，定一隻雞、一隻鴨，或者一隻豬做吖？」秋生咁講，擺明就係寸唐唐唔應該做特首啦。
梁桂香讚細佬唔貪心
至於梁桂香亦力撐細佬，話佢為人重情誠實，唔屬於佢嘅嘢一定唔要，所以絕對相信CY為人；又話細佬一向好堅強，即使近排咁多風風雨雨，亦肯定佢可以堅持落去喎。梁桂香喺本新書度亦透露，細個屋企好窮，CY每日返學只可食饅頭，但亦唔會貪心，即使有午餐肉食都拒絕，話要留番有客先食喎。