政情：煲呔曾至尊無賴

任職公務員四十五年嘅煲呔曾，自稱多年來跟足規矩辦事，跟住就將各界對佢嘅貪得無厭指控，全部賴落時代變咗，佢話：「我已經盡量追上時代，但永遠去唔到後生仔嘅要求！」佢好似如夢初醒咁，發現原來市民對特首操守嘅期望，同佢心目中諗嘅存有差距喎！佢差在未講埋，點解依家啲市民唔貪嘅呢？點解有私人飛機同豪華遊艇都唔坐呀？有富豪裝修埋間豪宅畀我住都唔得？

坐遊艇私人機體察民情？

煲呔曾接住話，香港係一個好細嘅地方，做特首要接觸唔同階層嘅人，所以喺去茶餐廳嘅同時，都要同上流社會嘅人接觸吓喎。意思係話佢坐富豪私人飛機同豪華遊艇係體察民情，難為佢講得出。佢又訴苦話，如果官員接受贊助時有乜疑問，尚可以問特首，但作為特首嘅佢有乜唔明，唔知可以問邊個喎？講到好似政府無制度畀佢遵從，接受款待都唔怪得佢咁，真係離晒譜。

賴完時代改變，煲呔曾又將租住深圳豪宅物業一事，賴落太太曾鮑笑薇身上。佢話：「呢幾年我哋收埋好多衣服雜物，我太太對一草一木都好緊張，連做女嗰陣啲衫都留喺度……我唔可以叫佢丟咗佢……所以地方都有限制。」就係咁，佢哋就搵咗深圳東海花園一個連天台達九千幾呎嘅單位，連三百萬人民幣豪裝，年租都係八十萬元人民幣啫，唔怪得佢話租金價好公道喇！

對於點解連日來每朝去聖堂都黑口黑面對待傳媒，而且封口唔回應醜聞，煲呔曾離譜到賴落神父身上，佢話大家有所不知喇，原來聖堂門口係唔畀講嘢o架：「喺門口搞（回應記者提問），神父會唔畀我嚟，向我投訴！」

聽完煲呔曾一大輪姓賴嘅解釋，唔話佢係「至尊無賴」都唔得，點解佢唔賴埋啲富豪請佢坐豪華遊艇、坐私人飛機、租豪宅畀佢住、送紅酒畀佢呢？