中環出更：黃業光「解放」超級狂牛
意大利著名車廠林寶堅尼生產嘅跑車，向來都係富豪車迷追捧對象，而最新款旗艦級產品Aventador LP 700-4自去年喺日內瓦車展亮相後，旋即引起各方注目。雖然售價高達六百萬港元，但定單依然多到排晒隊，好多都要待明年先交貨。不過，東華三院總理黃業光（John）就啱啱接收咗呢部超級跑車，上周五仲揸去出席東華慈善晚會。
其實卓妮喺晚會當日下午已先睹為快欣賞過阿John部跑車，全車外形充滿優美嘅幾何線條，無論從邊個角度去睇，都洋溢剛陽氣息，駕駛「狂牛」Aventador喺街道中穿梭，就儼如一件流動藝術品，惹來無盡艷羨目光。阿John話，早已聞悉林寶堅尼會推出新產品，於是透過代理訂購，結果快人一步得到呢部超級跑車，目前全港大概只有十架，可謂相當罕有。
運往外地一展身手
作為頂級跑車，當然集合尖端科技於一身，例如使用碳纖維作車身物料以減輕重量，配以七百匹強勁馬力，極速可達時速三百五十公里。對於呢部超級跑車嘅性能，阿John話香港嘅環境好難發揮，所以佢不時到東南亞或歐洲等地一展身手，之前亦試過將其保時捷跑車運到內地，然後從武漢經西安往內蒙，飽覽沿途綺麗風光，就算沙石刮花車身都冇所謂喎。