中環出更：貪「曾」枉法 張永霖：市民點睇我點睇
「曾」商勾結令全城怒吼，唔少名人都睇錯呢個貪得無厭嘅「香港仔」。尋日沙田馬場舉行花旗銀行香港金盃賽事，卓妮遇到香港大學專業進修學院校董會主席張永霖（Linus）夫婦，於是問Linus點睇「曾」商勾結啦，佢就笑笑口答話：「市民大眾點睇我咪點睇囉，我同市民大眾嘅觀感都係一樣！」咁講即係唔信煲呔曾清白囉！
前中信泰富董事總經理范鴻齡有份嘅團體馬「高耀之寶」尋日出賽，作為老友嘅Linus同埋太太去撐場，匹馬最終不負眾望跑出，大家都高興萬分。
講開歐債危機瀕臨爆煲，Linus話全球銀紙太多引起通脹，現時股市已經同經濟表現脫鈎，買股票唔再係投資而係投機，等同賭錢，所以佢認為最穩陣都係揸現金最好喎。
另一邊廂，太子珠寶鐘錶主席鄧鉅明（Jimmy）嘅四歲愛駒「閃耀之星」首次奪魁，姐夫朱繼陶同老友愛沙尼亞共和國駐港名譽領事林建康（Matthew）都戥佢開心。今次係Jimmy人生中首次拉頭馬，表現雀躍，笑言會將拉頭馬張相裱起喎。佢又話，多得Matthew牽橋搭線，介紹練馬師蔡約翰畀佢識，帶挈佢贏馬。
鄧鉅明：香港真係好得意
講到「曾」商勾結，Jimmy就覺得「香港真係好得意」，竟然會發生啲咁嘅事。當日首次捧盃嘅仲有馬會大董周永健（Anthony）同世交唐慶元，佢哋匹「同感」跑出，當然要開香檳慶祝啦。保良局總理陳正欣專程去捧Anthony場，仲好有眼光，買齊獨贏、單T、四連環樣樣中晒，真係好運。
卓妮