中環出更：陳淑莊「有機」即寸曾貪心
浸會大學有機資源中心尋日搞咗個有機試食會，請來名廚余健志（Jacky）、立法會議員陳淑莊（Tanya）、家庭醫生關嘉美等健康達人，即場試食有機食品，一齊向大眾推廣有機飲食，其中Tanya試食之餘仍不忘暗寸煲呔曾。
關嘉美撐本地農場
Tanya奉行有機飲食，佢話有機食品係食唔出係咪「有機」嘅，菜農要偷龍轉鳳話咁易，所以政府嘅有機認證好重要。佢笑笑口話：「你搭飛機畀咗頭等艙嘅價錢，都唔想坐經濟艙啦，你估好似有啲人咁，畀經濟客位價錢，就可以坐豪華客位咩？」Tanya咁講，擺明寸爆煲呔以經濟客位價錢坐私人飛機啦！
私房菜「囍宴」老闆Jacky話，有機食材唔落農藥，受蟲蛀機會大，植物損耗達三成，供應唔係咁穩定，所以小型餐廳都係適合用有機食材多啲。至於關嘉美就自言注重健康，當然力撐有機食品。佢覺得本地有機農場好值得支持，促進就業又可供應本地市場，產量多咗，食品價格自然下調喎。
現場仲見到有機餐廳主廚Vivi Cheung，佢話好多朋友都因為飲食唔健康而患癌離世，令佢更明白有機飲食嘅重要性，近年積極引入澳洲有機食品，希望惠及食客。