中環出更：鄧肇殷品嘗精緻香港菜
仁濟醫院副主席兼東區區議員鄭承峰（Baldwin）新開嘅「壹玖捌叁」餐廳，開業冇耐已成為仁濟董事局兄弟姊妹聚會嘅新熱點。日前一個午膳時間，卓悅集團高層、仁濟總理鄧肇殷（Erica）相約Baldwin喺度試菜，兩人邊享受精緻香港菜，邊傾吓即將登場嘅派福袋活動，無論食嘢或做善事，兩人都啱晒嘴形。
當日主人家Baldwin介紹咗好多拿手好餸，包括惹味嘅七味椒鹽茄子、滋補嘅鮑肚瑤柱金腿燉菜膽湯，食到Erica讚不絕口。
鄭承峰派福袋感觸良多
香港人出晒名忙碌，食晏時間至緊要快，所以餐廳喺午市時間推出多款快靚正麵食。是日行政總廚黎師傅特別介紹龍皇海鮮金絲麵，純手工炮製嘅麵底及主菜分別以雙層蒸籠上枱，既精緻又有心思。再加上味道醇厚芳郁嘅「鳳凰單叢」靚茶，食得豐富又健康。
講到仁濟年度盛事派福袋活動，Baldwin話，次次見到老人家收到福袋時喜出望外嘅神情，佢就好感動，不過，有時碰見為咗意頭而揸靚車嚟攞福米嘅有錢人，佢更加感觸良多。做善事，令佢睇到唔少人生百態。
卓妮