中環出更：鄭明明豪擲百萬掃皮草
北京兩會三月初開幕，政協、人大又要趕上京。「美容教主」兼全國政協委員鄭明明上京前狂掃名貴皮草，一拋近七位數字，認真豪。
卓妮早兩日行經尖沙咀，撞見明明姐獨自喺半島酒店商場高級皮草店MARI FURS內揀皮草，店員熱情招呼，推介一件白色帶黑間短身皮草，毛身係中國山貓毛，品種稀有，明明姐試上身後走到鏡前欣賞一番，滿心歡喜。皮草叫價高達六位數字，但唔使十分鐘，就扑錘買入。明明姐之後再睇中另一件黑色水貂大褸，穿上身後，又是愛不釋手。埋單計數，兩件皮草合共花費近百萬元。使得咁豪，店員亦識做，提供送貨上門服務。
上京開會着新衫
滿載而歸嘅明明姐笑住離開，卓妮上前打招呼。佢話，每年上京都會買皮草，等兩會開幕當日有新衫着。呢個習慣多年不變。半島嘅MARI FURS，係入貨「勝地」。至今幫襯四、五十件，乜顏色都買齊。
卓妮