政情：警網站遲解禁誤導市民
沙頭角部分禁區自上周三「解禁」至今已幾近一周，不過警察網頁卻「甩轆」，至昨晚仍未更新，市民如果上警察網查資料，信佢就真係死嘞。
六條明明已被釋出禁區外嘅村落，尋日下晝喺網頁上仍在「在禁區內的村落」之列，同頁更展示出一張「石涌凹警察檢查站」嘅相片，但事實上嗰個檢查站亦已經停用，所以資料有誤導市民之嫌。
「出事」嘅警察網頁頁面，喺「邊境禁區通行證辦事處」中「關於邊境禁區範圍」嘅分頁，有一二年二月最後更新嘅字樣，睇個日子又疑幻疑真，但已於上周解禁、包括擔水坑同塘肚等六條村嘅名仍被列於「在禁區內的村落」名單上。咁刁鑽嘅地方，當然係唔識至要睇資料，網頁上竟然提供唔正確嘅資料。警方聽到我哋查詢，已經拿拿聲將資料更新。