政情：周允成指金鑽難分高下
近年黃金價格好似直升機咁升，唔少人都愛買金保值，不過亦有人愛買閃閃生輝嘅鑽石。周生生集團副總經理周允成（Winston）話，黃金同鑽石各有價值，好難講話買邊樣比較好，不過以國際視野嚟睇，黃金可以用作國際貨幣，認受性較高。
日前喺鑽石總會晚宴上見到Winston，身為主席嘅佢大談鑽石前景。Winston話，鑽石固然罕有，盤古初開以來，人類開採出嚟嘅鑽石量，只係等同一架雙層巴士咁多。同鑽石相比，黃金並不罕有，但係鑽石仲未可以取代黃金嘅國際地位，因為唔少國家都會以黃金作為貨幣進行交易。佢建議大家，如果要買鑽石保值，不妨揀大粒同冇花嘅，事關「物以罕為貴」，愈大愈純淨、冇瑕疵嘅鑽石就愈值錢。
Winston話，雖然金價喺年中受不利消息影響而下滑，不過今個農曆新年、元宵佳節同西方情人節時間都好相近，加上政府大派六千蚊，刺激消費者意欲，黃金價格都略為回調，展望今年經濟都係審慎樂觀。