政情：煲呔曾涉足江湖丟晒架
煲呔曾仲有四個多月就「退伍」，佢已經hea住等收工好耐，一早將開工到最後一分一秒嘅說話拋諸腦後，最近佢仲放肆到不理身份秘密「過大海」到澳門出席江湖社團猛人宴會，期間畀人當場踢爆即時知理虧上車快閃，煲呔曾身為特區第一把手竟然同紅黃藍白黑人士同場，是非羞恥之心蕩然無存，香港形象就咁畀佢一手摧毀，勢必喺歷史上留下千古不滅嘅惡名。
《東方日報》同《太陽報》尋日獨家報道，煲呔曾喺剛過去嘅周六同周日，同妻子曾鮑笑薇到澳門，同一批賭廳人士、貴利集團中人、夜總會從業員同多名江湖社團猛人飲宴，仲靜悄悄入座主家席諗住冇人發現，最後畀人見到舉機影相暴露行蹤後，不消一刻就同妻子落荒而逃。
想管埋港澳地下秩序？
眾所周知，身為一個國家或地區領導之首，一言一行都代表呢個地方嘅形象，應該千方百計留個好印象畀其他人，但剛愎自用嘅煲呔曾反其道而行，非但冇謹言慎行成日同人鬥嘴，連結交朋友都冇足夠嘅政治敏感度，除咗平時與官商名流圍威喂外，竟然同江湖人物等人同枱飲宴濟濟一堂，絕對係為老不尊教壞細路，有冇法治精神亦頓成市民嘅疑問，甚至令人聯想佢過去幾年係咪都係以不公不正不義嘅準則做特首，定係佢想管埋港澳嘅地下秩序？
其實以「香港仔」自居嘅煲呔曾失德失言表現非今日先出現，猶記得去年十月出席立法會答問大會時，當場「發爛渣」以近乎爛仔行為，反屈提問嘅人民力量立法會議員黃毓民講粗口、爛仔同表現猶如「黑社會」。佢自己都出席江湖飲宴喇，只係扮到道貌岸然咁啫，邊個黑邊個白真係唔係睇表面囉。
話時話，如果煲呔曾繼續唔理政治道德倫理我行我素，遲早令自己嘅政界前途「車毀人亡」，奉勸煲呔曾應該盡快回頭是岸，否則繼續失德失言，分分鐘未到六月三十日換屆就會提早被叮走，做香港人嘅，就更加乜面都無晒嘞。