台灣電影《海角七號》曾風靡影壇，其實香港亦唔輸蝕，出咗部現實版嘅「海角工地」，可惜唔止唔浪漫，簡直睇到眼火爆。
位處香港東南之端嘅蒲台島，以奇石景觀聞名，係市民郊遊嘅熱門之選。但近排島上竟然大興土木，天然美景面目全非，鬱鬱葱葱嘅青山變成邋邋遢遢嘅地盤。
本報記者直擊發現，蒲台島公眾碼頭附近幾個山頭出現千幾個三呎乘三呎嘅神秘水泥板，涉及土地估計最少十萬平方呎。工程範圍內好多樹被斬，現場除咗有大批施工工具同材料，仲有多架小型電動運輸車，工程規模可想而知。
雖然現場工人拒絕透露水泥板嘅用途，但殯儀業人士判斷，呢啲好可能係骨灰龕或金塔存放位。而當地居民同郊遊人士就擔心，郊野地作呢類用途，唔止破壞風景，仲會引起風水同保育問題。
眾所周知，蒲台島生態價值高，係本港僅次於米埔自然保護區嘅最受歡迎觀鳥地點，依家畀人搞到面目全非，簡直大殺風景。有網民踢爆，有關工程舊年聖誕已經展開，最近一個月規模仲不斷擴大，搞到幾個山頭都係水泥板。咁就奇喇，咁大規模嘅工程，而且已經開工兩個月，港府居然好似一無所知，你話係咪匪夷所思吖？
其實，當局唔係一無所知，而係闊佬懶理。離島地政處話喎，今年二月接到有關投訴，實地視察發現，涉事地點涉及私人土地同官地。
有冇搞錯！舊年聖誕已經開工，如果冇人投訴，睇怕地政處班官老爺仲坐喺辦公室印印腳。咁搞法，隨時成個蒲台島畀人反轉，連一棵樹一隻雀仔都搵唔到，佢哋可能仲矇查查！
唉，港產官僚在其位不謀其政，市民見怪不怪咯。水務署出晒名管水唔惜水，地政處管地唔守地，又有乜出奇吖。呢，深井一段政府擁有嘅掘頭路，○六年起被人「私有化」做停車場牟利，附近居民被迫兜路行，不斷向有關部門投訴，但六年來當局乜都冇做過。
講到土地管理失職，最典型莫過於西貢大浪西灣呢個「香港十大勝景」之首，因為遲遲冇被納入規劃大綱圖，畀人掘到爛蓉蓉，差啲變咗富豪私人俱樂部。至於新界鄉郊官地變垃圾場、農地變骨灰龕嘅個案，更加多不勝數。
官地任人霸，庸吏我自為。今次「海角工地」規模之大，當局反應之慢，令人嘆為觀止。嗱，咪話功夫茶唔提醒，如果今次又係跟而不進，不了了之，大浪西灣風波隨時喺蒲台島重演，到時睇吓你哋又點樣補鑊！