政情：田二少父女度橋扶貧
曾經參加過電台節目《窮富翁大作戰》嘅新民黨副主席田北辰（田二少），除咗因此提升知名度外，亦深深體會到活在貧窮中有幾咁辛酸。早前佢同細女Lavina傾開，先知道兩父女嘅理念原來好一致，都想為扶貧出一分力，依家正在構思「買一送一」扶貧計劃。
身為G2000老闆嘅田二少話，唔少貧窮地方嘅日常生活用品缺乏得可憐，莫講話係襪，分分鐘連鞋都冇得着，所以好想幫助吓呢啲貧困地區。咁啱囡囡Lavina曾經參考過一個美國著名造鞋品牌TOMS，秉持住「顧客買一對鞋，公司送一對鞋畀貧童着」嘅理念，令唔少貧童擺脫冇鞋着嘅命運。
田二少覺得呢個理念非常好，打算喺旗下公司搞一個類似嘅「買一送一」計劃，但佢覺得捐衫太過普通，而捐頸巾同外套又唔係四季用得着，所以話要再諗下捐啲乜嘢係最好喎。