政情：應家柏「剪指甲」行善
香港人生活節奏急速，不少人會在公眾場所剪指甲，啲指甲周圍彈，好唔衞生。同樣係大忙人嘅馬會行政總裁應家柏，尋日喺馬會「全方位學習工作坊」啟動禮上，竟然眾目睽睽拿起指甲鉗來，令在場嘉賓嚇一跳，難道佢平時忙到連剪指甲嘅時間都冇？
當大家再睇落去，先至發現應家柏手上嘅指甲鉗，原來裝有放大鏡功能，其實係佢親手挑選送畀長者嘅禮物，所以佢就作狀剪指甲示範點用，仲作狀幫埋馬會主席施文信剪指甲添，引來全場嘉賓爆笑。其實應家柏純粹搞氣氛，真正目的係鼓勵年輕人多啲送小禮物關懷長者。
至於施文信就預備咗一對方便長者使用、裝有彈弓嘅「易用筷子」，同樣盡顯細心。啟動禮上，逾一千五百名來自東華三院嘅高中學生與馬會義工隊成員，攜手創造巨型福袋及心形圖案，馬會稍後會向健力士世界紀錄申請成為全球最大嘅福袋。