政情:郭妤淺港太稱冠實至名歸

女人最痛,莫過於將終身幸福,寄託喺一個冇膊頭、冇腰骨嘅男人身上。近期全城熱爆嘅特首參選人唐英年(唐唐)大宅僭建風波,唐唐左閃右避幾日之後,將責任推晒畀太太唐郭妤淺嘅一幕,真係傷透好多女人心,無不大鬧唐唐冇膊頭,同時亦辣興城中有腰骨嘅男人。

有睇唔過眼嘅城中名人話,如果有「香港太太」選舉,冠軍寶座非唐太莫屬,仲可以橫掃「最能容忍」及「最高設計能力」大獎添!

近日政商界對唐唐擺老婆上枱好有意見,好似浙江省政協、時代裘皮動物有限公司董事總經理單志明話,當日佢同太太坐喺電視機前,睇到唐太為夫頂罪,鏡頭前喊到梨花帶雨,加上一句「係我一手搞出嚟」,真係令人心都噏埋。

佢即刻話畀身邊嘅太太聽,要學吓唐太點做人老婆至得,事關佢第一次現身為老公嘅感情缺失拆彈,已經好為難,估唔到第二次仲大鑊,畀枕邊人跣到冇面見人,認真好偉大。

所以話呢,如果香港有「香港太太」選舉,唐太奪冠實至名歸,仲可以攞埋「最能容忍」大獎,兼且以佢將地牢設計成王宮嘅超卓品味,掃埋「最高設計能力」大獎都唔係問題!單志明喺社會公職唔少,係中華出入口商會會董、浙江省東陽同鄉會會長,雖然鄉下同唐唐嘅家鄉江蘇無錫好近,但講到做男人嘅原則,就算係鄉里都冇面畀呀!

新春團拜 女士們咬牙切齒

俗語有話「一個願打,一個願捱」,就算係唐太甘願受屈,但唔少女士都極之同情唐太受到感情折磨。近排新春團拜多,好多女士一見面,唔係互相恭喜,而係數臭唐唐,無不咬牙切齒鬧唐唐卸膊嘅一幕,簡直傷透女人心。如果依家有機構做民意調查,問吓港女會否因此對男人失晒信心,甚至考慮唔嫁,話唔定數量會急升添。

如果港女因此唔敢靠男人,港男惟有北上娶老婆,因而產生更多中港家庭孕婦,再而因為來港分娩問題激化兩地矛盾,咁唐唐就真係成為歷史罪人喇!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報