中環出更：李雲迪一聽《蕭邦》即醒神
有「中國蕭邦」之稱嘅鋼琴王子李雲迪，尋日特登由北京趕來香港，出席一個學童慈善交流演奏會，擔任愛心大使兼客串演奏。演奏會之前，大會安排咗一班學生彈鋼琴，請李雲迪即場欣賞同畀評語，但可能佢經過一夜舟車勞頓後，不免面露疲態，對學生嘅評價只係一句起兩句止，但大部分都係正面評價，相信對學生有種鼓勵作用。
獲邀來港與學生交流
不過，當有學生彈到李雲迪最拿手嘅《蕭邦夜曲作品9第一章》時，佢就聽得相當留神，連個頭同身體都隨住節奏擺動。卓妮見到有份贊助演奏會嘅「玩具大王」蔡志明太太李惠莉，佢覺得呢個活動好值得支持，因為學音樂嘅器材同學費唔平，唔係個個負擔得起，今次籌到嘅善款將會作為學童嘅音樂培訓用途。
曾經做過幼稚園教師嘅蔡太話，自己都有學過彈琴，不過唔算叻，佢話彈琴係一種興趣同享受，可以陶冶性情，將不快從音符發洩晒出嚟，脾氣都好啲，所以佢好鼓勵小朋友學音樂，依家連三歲幾嘅孫女都開始學琴喇！同場仲有中華總商會會長蔡冠深太太蔡關穎琴，蔡太話因為自己係香港管弦樂團成員嘅關係，經常都聽李雲迪演奏，大讚對方嘅琴聲優美，好適合彈蕭邦嘅樂曲。