淫賤黎有幾衰衰格格，壹淫媒有幾賤賤格格，免費派發嘅《爽報》有幾鹹鹹濕濕，相信都唔使多介紹嘞，淨係一個數據已經足以說明一切。自從去年九月《爽報》獻世以來，影視處總共收到二百零九宗投訴，涉及該報內容不雅、淫褻同暴力等等。影視處曾將二十六件《爽報》發布嘅物品送審，當中二十三件被淫褻物品審裁處評定為不雅。
至於特區政府對於淫賤黎有幾縱縱容容，港英餘孽有幾包包庇庇，同樣都唔使多花唇舌，事關已經係司馬昭之心路人皆見。今日，功夫茶有一個建議，反正影視處之流長期放任壹淫媒為禍人間，不斷荼毒青少年未成熟嘅心智，不如咁嘞，索性發一個正式嘅「淫賤牌照」，由得壹淫媒打正旗號禍港殃民，呢家嘢叫做宣淫販賤合法化！
嗱，唔單止功夫茶睇唔過眼㗎，民間團體同樣嬲到震。尋日喎，立法會教育事務委員會和資訊科技及廣播事務委員會召開聯席會議，二十個團體出席表達不滿，異口同聲譴責《爽報》充斥色情資訊，簡直係無性不歡，將女性身體商品化。至於現時形同虛設嘅淫審機制亦係炮轟對象，影視處執法歎慢板，對屢犯不改嘅積犯懲罰過輕。既然《爽報》犯眾憎，所以咯喎，民間團體促請政府嚴懲法辦，包括考慮扣分制，吊銷督印人牌照，甚至拉去坐監以收阻嚇作用。
喂，香港性文化學會事工主任麥沛泉講得啱㗎，政府呢十幾年好似快閃黨，○九年聲稱會就《淫褻及不雅物品管制條例》檢討推出第二輪諮詢，不過至今仍然不了了之。
面對群情洶湧，你估影視處處長劉明光點樣回應吖嗱？佢話喎，好難因為一個人或機構犯事，就假設佢有罪，或懷疑佢經常有罪。嗱，咁狗屁不通嘅混帳講法咪就係縱容包庇嘅證明囉，家陣邊個同你假設《爽報》有罪或者懷疑經常有罪？不必假設，毋須懷疑，鐵一般嘅事實擺在眼前，淫褻物品審裁處已經裁定咗《爽報》連犯二十三罪，問題係官老爺捨唔捨得重拳出擊棒打自己養慣養熟嘅一隻淫賤寵物㗎咋！
所以話啫，一於宣淫販賤合法化，索性發牌畀淫賤黎搞三搞四囉，笨！即係咁，真小人永遠好過偽君子，政府冇必要戴住偽善嘅面具助紂為虐，不妨光明正大透過正式發牌對外宣稱，係呀，港英餘孽真係照住淫賤黎呀，吹咩！
唉，唔好怪功夫茶發晦氣，見到一個咁嘅無良政府，明知《爽報》之流嘅鹹濕刊物日日夜夜助長歪風都唔出手制止，正常人都會激到吹鬚睩眼啦，唔發晦氣真係難洩心頭之恨！