艾青說：為甚麼我眼裏常含着淚水？因為我對這土地愛得深沉。煲呔曾：為甚麼我眼裏常含着悲怨？因為我心裏留下一條刺，任滿將暫離港，盼市民聚焦新特首，不要記住我！煲呔曾人之將走，其言多閃爍，即使燈火輝煌慶下台，內心總有百般滋味在心頭！
從「寂寞的推銷員」到位極人臣，煲呔曾臨收工，其實好應該高興吓，卻酸溜溜拋下一句「不要記住我」，大佬呀！你估你係浪漫詩人徐志摩咩，要告別天上的雲彩，揮一揮手，不帶走一片白雲？老朽但知，好似昨日的情人節，情侶之間為了表示忠心摯誠，經常會話：「我若負你，天打雷劈」，當然，如果此類「肺腑之言」成真，恐怕死得人多矣！之不過，打情罵俏，有時係反話：好衰㗎你！你再咁鬼死花心我就不要你喇！身為男友的，內心暗喜：今次仲唔得米！
其實，煲呔曾若有自知之明，根本毋須出聲要廣大市民「不要記住佢」。唉，治港七年，老朽一如一眾網民，只要一息尚存都忘不了你！佢走之前，懇請周一鑊局長再為我哋獻唱一次：只要一息尚存都忘不了你！縮骨治港到最後一分鐘，網民怒吼，真正蝗蟲原來就係佢——每年花逾四百萬養足一條超級廢柴七年，香港人忍夠了！
語云：三尺之冰，非一日可融。煲呔曾，你離港度假一段時間，港人都忘不了你，強烈要求你歸還三千萬人工給香港！