尋日係情人節,科技大學校長陳繁昌特登趁呢日大搞傳媒春茗,請大家去佢府邸參觀,而且仲預備咗一系列心形啫喱、心形蛋糕及心形湯圓款客,祝大家甜甜蜜蜜開開心心。陳校長將記者當係情人一樣,對老婆就更加花盡心思。
陳校長話,佢任職會計師嘅太太近日返咗美國,佢一早就越洋訂咗一大紮康乃馨,計番十幾個鐘頭時差,今日就係當地情人節,紮花就會準時送到老婆手上。
咁都未夠,佢話到時一定要同老婆越洋視像傳情,興之所至隨時彈住結他唱番首情歌,陳太一定冧到爆。
咁有心思嘅陳校長,對學生當然照顧周到啦。雖然科大有七百個宿位趕唔切喺新學期啟用,但校方已向鄰近嘅三育書院租借三百個宿位,又喺大埔仔租村屋畀學生住,嚟緊又會安排穿梭巴士接載返學,相信九月開學嗰陣,學生嘅食、住、行都無問題。