政情：民記自由提名 恐釀分化
手握一百四十七票特首選委提名嘅民建聯（民記），遲遲未開會討論提名取向，無非係因為黨內有唔同聲音，搞到黨內領導層都唔知點收科。不過，民記最近眼見難以管束黨員已成既成事實，所以焗住決定畀黨員自由提名，但此舉可能會令黨內嘅挺唐或挺梁派互相攻擊，勢成水火。
民記前日開會決定畀黨內選委自由提名特首參選人，據聞北區區議員劉國勳及觀塘區議員洪錦鉉等人已經率先簽署提名畀特首參選人梁振英，有唐營中人聞風後都不敢怠慢，即時致電未決定取態嘅民記區議員「拜票」。
面對黨員爭先恐後提名兩名建制派參選人，據聞黨主席譚耀宗（譚sir）都有啲擔心，所以做好事前消毒工作，表明大家可以選擇提名或不提名，倘若有人唔提名都希望大家互相尊重喎。其實譚sir言下之意，都係唔想黨員因為唔同提名意向而自相殘殺，如果真係因為咁而不和，民記內部真係要好好檢討喇。