政情：長毛與「布殊」廟街撐枱腳
尋日情人節，有讀者聲稱喺油麻地廟街一間大牌檔見到立法會議員梁國雄（長毛），同美國前總統喬治‧布殊撐枱腳，身旁仲有兩、三個外國保鏢保護，如臨大敵，街上嘅途人紛紛駐足拍照，之後仲有人將同枱食飯合照上載到facebook，真嘅一樣。唔通長毛榮登社民連主席後，布殊都要請佢食飯？
不過，望望吓，呢位「布殊」塊面有啲怪怪哋，況且布殊又點會肯同長毛踎大牌檔吖，其實只係一個美麗嘅誤會。原來呢位「布殊」真名叫Steve Bridges，係美國著名諧星，專長化妝模仿名人，佢○六年曾經喺美國白宮記者協會餐宴中同真嘅布殊上演一次「真假布殊」，而Bridges亦模仿過美國前總統克林頓及現任總統奧巴馬，而阿諾舒華辛力加都畀佢扮過，咩都難唔到佢！
至於點解Bridges尋日喺廟街出現，長毛就話同Bridges首次見面，獲邀參加一啲創意活動，可能食飯係活動嘅一部分啩。不過，再望清楚Bridges參觀過嘅地方，附近都有收音咪及攝影機，睇嚟似拍戲多啲喎，咁長毛知唔知自己入咗鏡呢？分分鐘打入荷里活都唔知。