政情：丘成桐插鬍鬚曾亂派錢
鬍鬚曾就任財爺以來，莫講話年年計錯數、錯估盈餘，最核心嘅理財政策都搞唔掂，單係去年向每位市民派發六千元，派到亂晒龍，已為人詬病。蜚聲國際嘅港產數學大師丘成桐，毫無保留地批評鬍鬚曾派發六千元計劃，對香港長遠發展並無助益，形容係一個十分浪費嘅計劃，倒不如將資源撥給大專院校培訓人才，避免將來被內地大學超越。
丘成桐批評，港府近年對高等教育投放嘅資源不足，相反內地嘅高等院校如北京大學、清華大學得到嘅資助就愈來愈多，雖然目前內地院校所獲嘅財政支援不及香港，但按現時趨勢，再過五年香港院校嘅財政實力就會被內地所超越，如此香港院校想吸引優秀人才將更見困難，分分鐘要靠內地輸入人才。佢認為香港長遠發展要行高科技，而大學就係科技精英嘅搖籃。
不過，丘成桐批政府亂咁派錢之餘，又白白浪費一筆可觀嘅行政費，有否想過其實可以運用得更好呢？好似援助貧苦大眾或增加教育資源。如今派錢已既成事實，但筆錢並非人人需要，與其大飲大食亂咁使錢，佢去年就發起「中大人，愛中大，萬眾一千」嘅捐款運動，呼籲全球嘅中大校友捐出一千元，來支持母校嘅「I.Care博群計劃」，讓中大嘅學生能夠拓寬視野。
捐款中大 捐一得三
丘成桐提議各校友捐出一千元，佢就身先士卒捐晒六千元，為母校略盡一點綿力。佢憶述，當年其兄長在中大求學期間突生惡病，有賴崇基校友嘅籌措來應付醫療開支，對家境清貧嘅佢嚟講，確係一個沒齒難忘嘅恩惠，所以佢一直大力支持母校發展。
今次捐款計劃剛好配合政府嘅配對基金，而周大福慈善基金尋日又捐出一千萬元，以一對一配對校友嘅籌款計劃，所以校友每捐一元，就可為母校籌得三元。雖然周大福慈善基金理事長鄭家成並非中大校友，但好認同博群計劃嘅理念，仲盛讚丘成桐嘅募捐計劃係捐一得三，有槓桿效果，不愧為數學大師喎。