中環出更：浙聯團拜如屋企人聚餐
香港浙江省同鄉會聯合會（浙聯）日前喺灣仔新會所舉行新春團拜，會長李德麟及浙江幫老中青三代齊集，盡享地道家鄉美食。曾任金銀業貿易場理事長嘅李德麟，係知名金融家兼上海總會永遠名譽會長李和聲兒子，佢盛讚浙江軒餐廳菜式一流，集齊城中四大江滬食肆上海總會、夜上海、蘇浙匯及鷺鷺酒家嘅拿手菜，冇得彈。
父子父女兵孖住現身
當晚有好多兩代同堂嘅溫馨組合，包括前會長車越喬及浙聯青年委員會主席車弘健父子、浙聯秘書長楊麟振及青委副主席楊靈父女、常董鄒星培及青委常務副主席鄒漢章父子等，難怪李德麟笑稱，當晚係自己屋企人食飯。
是夜宴客菜式包括清蒸鰣魚、紅燒大元蹄、香煎八寶飯等經典佳餚。車弘健同青委一班兄弟姐妹舉杯暢飲，大家情緒都好高漲。Sharp代理商聲寶－樂聲（香港）主席李本俊都現身撐場，佢話至愛清蒸鰣魚，一個人食晒成條都冇問題。
食完開年飯翌日，浙聯一行四十幾人即刻組團訪問家鄉，探討浙港文化交流及經濟合作。此行由李德麟做團長，一眾浙商包括聲寶－樂聲（香港）創辦人李達三、李和聲等都隨團北上，愛鄉之情認真唔話得。