慶祝情人節方式人人不同，有人享受燭光晚餐二人世界，亦有人選擇外遊。卓妮呢兩日留意社交網站facebook時，就發現Sony Computer Entertainment香港分公司董事項明生（James）去咗南美旅行，仲千山萬水到訪玻利維亞「天空之鏡」，佢形容恍如置身天堂一樣，所以冇互聯網連接地球，相當風趣。
好鍾意到處旅遊嘅James形容，今次係佢有生以來最艱難嘅一次旅行，因為冇直航機，旅程相當轉折。不過相信幾辛苦都係值得嘅，事關「天空之鏡」令人嚇一跳，因為鹽湖嘅反射，令天空與陸地二合為一，難怪James驚嘆道：「我信了，天堂？是真的！吻了雲，好綿好甜；摸了天，很暖很滑。」情人節身在一個咁特別嘅地方，實在難以令人忘懷。
其實James今次南美之旅到過好多地方，先到智利嘅世外高原鹽湖上浮着看書，睇到幾乎瞓着，相當享受。佢話該處並無約旦、以色列嘅死海咁出名同商業化。之後佢又到過同樣難去嘅智利復活節島，與島上嘅Moai人形石像親吻，佢驚訝巨石像同秘魯馬丘比丘印加巨石一樣咁完美，跟住用自己印有馬丘比丘風景照嘅名片攝在石縫中，話打通兩地文明喎。