曾俊華呢一位哥哥仔真係好鬼死得意，人做財爺，佢做財爺，鬍鬚曾硬係做到派錢都畀人剷到上天花板。舊年嗰一份預算案，派六千銀都冇辦法討人歡心，今年呢一份預算案，係就係開倉狂掟八百億，不過仍然淪為萬箭穿心嘅受靶對象。唯一值得慶幸嘅係，曾俊華再過幾個月就收工落台嘞，望只望下一個財爺唔會咁激心啦。
鬍鬚曾到底點激心呢？淨係年年計錯數，仲要係錯到離晒大譜嗰隻，呢家嘢已經罪無可恕。就好似任內最後呢一份預算案咁吖，本來話係八十五億元赤字，點知埋單一算居然係六百六十七億元盈餘，一來一回相差七百五十二億。喂，計錯數好大劑㗎，嚴重影響長遠規劃吖嘛，搞到做起事上嚟小手小腳。
事實上曾俊華的而且確十分短視，餐餐都係推出一次性措施，宏圖大計一律欠奉，畀人剷到上天花板唔係冇理由㗎。你知啦，預算案唔應該係避孕套，一次性即用即棄咯喎，實在難登大雅之堂。一次性都算嘞，鬍鬚曾偏偏漠視草根階層嘅Ｎ無人士，窮人大軍以及一般百姓想唔火滾都難。
「東方報業民意調查」顯示，對於曾俊華冇惠及Ｎ無人士，三成九受訪者批評預算案冇長遠措施滅貧；兩成直斥預算案冇關注在職貧窮問題；兩成認為，扶貧措施小恩小惠；百分之九覺得可以研究租金補貼。
冇錯，最後一份收工預算案回應咗不少訴求，例如支援中產，例如重建醫院，之不過咁，遲來的補鑊無法贏得歡呼。三成六受訪者認為係因為問題爆煲，政府先至被迫正視；兩成九不滿政府長期漠視訴求；一成五質疑曾俊華散財係為咗博取掌聲。
開講都有話，風吹雞蛋殼，財散人安樂。可惜吖，財係散咗嘞，竟然冇人安樂，包括博唔到掌聲嘅曾俊華自己。調查又顯示，預算案多方面令市民失望，三成七認為扶貧措施不足；兩成三覺得冇派錢最失望；一成三批評教育資源不足。
其他民調數據唔講嘞，總之就係有彈冇讚。功夫茶想同大家研究一個問題，你估下任財爺會唔會都係民望咁低殘吖嗱？計功夫茶話齋，接任人一定唔會民望低，起碼上任初期會有一個不必萬箭穿心嘅蜜月期。就好似當年不受歡迎嘅董建華落台咁之嘛，接任嘅曾蔭權民望高到嚇死人，後來只不過不思進取先至將自己嘅人氣敗清光。所以咯喎，曾俊華執包袱之後，市民係會有期待嘅，期待一個唔再炒冷飯又計錯數嘅新人事新作風。至於新財爺會唔會係另一個民望敗家仔，咁就要放長雙眼嘞。