政情:張建宗留任不置可否

夕陽政府得番幾個月任期,好多人都想知究竟現任嘅司長同局長中,有幾多個會留任到下一屆政府。「史上最廢財爺」曾俊華之前就話等通過財政預算案之後,先考慮留唔留任嘅問題,尋日勞工及福利局局長張建宗畀人追問會唔會「順利過渡」時,佢就好機警咁話,都係聚焦講番財政預算案同安老問題。或者喺呢個時刻,佢答乜都死。

張建宗尋日出席電台節目,交代財政預算案中嘅安老政策。當佢被主持問到,點樣確保下屆政府會繼續推行勞福局依家「打咗樁」嘅措施,而張局長自己又會唔會留任睇住呢啲措施時,佢諗都唔使諗就即刻答,話聚焦講番預算案同安老問題,又拍晒心口話,佢哋啲措施唔會有人拆樁。到記者再問佢之後用咩角色睇樁柱建成大樓,佢都係重複嗰句「我今日集中精神講預算案」,睇嚟想撬開局長把口都幾難。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!