政情：陳茂波元宵節搵碇匿
今日係新十五，即係元宵節，亦係中國情人節，會計界立法會議員陳茂波（Paul）尋日喺社交網站facebook話，今日要同太太搵個地方躲一躲，佢上載咗一張大浪灣嘅相上facebook，話香港好多地方好引人入勝，例如大浪灣，唔知佢係唔係諗住今日同太太去大浪灣呢？睇唔出佢都幾浪漫喎。
坊間有好多評論，都認為今年香港經濟潛伏唔少危機，係頗為艱難嘅一年，但阿Paul就反而幾樂觀。阿Paul話香港嘅經濟環境好受外圍因素所影響，外邊風大雨大香港呢度亦唔會可以有覺好瞓。然而中港兩地嘅經濟有密切關聯，只要內地經濟保持平穩，香港亦唔會太壞，至於樓市，佢就預料頂多只係跌一成。
龍年伊始，阿Paul梗係希望大家事事順利，開開心心。佢話只要特區政府可以妥善處理雙非孕婦與房屋問題，社會上自然少咗好多怨氣，大家自然就會開開心心。