政情：政治助理愈撈愈冇癮
政治助理一直畀外界批評質素參差、職責唔清唔楚，薪酬過高，就連政制及內地事務局局長譚志源早排都話班政治助理有減薪嘅空間，即係間接話政治助理浪費公帑。班政治助理聽到局長咁講就四出訴苦，話佢哋喺政府架構裏面其實好尷尬，喺班公務員眼中，佢哋係怪物，一直都夾唔嚟。由於定位不清，政助之中有人做到分身不下，亦有人被投閒置散。咪話依家話要減薪，就算唔減都未必有政助肯留低。
譚志源早排提出，話政助嘅薪金可以由依家嘅十二、三萬蚊減至八、九萬蚊，令一眾政助嘩然。大家都唔明點解譚局長冇事冇幹提起減薪，仲話等到選咗新特首、睇吓新特首有咩諗法先至再講都未遲。之不過譚局長咁快爆響口，令一班經常被批評到體無完膚嘅政助更加意興闌珊。
有政助同我哋呻，話查實佢哋之中，有部分人不知幾大壓力，就好似有政策要喺立法會通過咁，佢哋就要負責游說各黨派。有啲政黨唔係一時一樣，就本身已經四分五裂，淨係一個黨都要氹掂幾個阿頭，何況仲有咁多個黨派，所需時間已經係超乎你想像，根本唔夠時間做其他嘢。出年立法會又重新選過，相信情況更加惡劣。
盲婚啞嫁 投閒置散
佢哋呻話，呢班政助當初係集體招聘再各自分配到唔同決策局。佢哋同班局長就好似盲婚啞嫁咁，夾唔夾都係嫁咗先知。有啲政助同局長唔夾，局長又唔放心畀嘢佢做，政助只能投閒置散，好似白逗人工咁。加上政助身份又尷尷尬尬，有時同公務員都唔知點合作，搞到磨合唔到，已經幾年喇，都無法搞成一個團隊。
其實呢班政助之中，唔少人喺自己本身嘅專業範疇都算係精英，喺私營機構仲分分鐘高薪過打政府工。何況做政助，合約完咗仲要過冷河一年，變相八折支薪，所以話佢哋入政府其實都未必為咗賺錢，分分鐘仲要減人工咁坎坷，相信依家呢幾位都冇咩邊個想留低。
政助原來都有佢哋自己嘅辛酸，怪就怪設計呢個制度嘅特區政府，當年包括時任政制及內地事務局局長嘅林瑞麟，搞一個機制出嚟又無諗清楚，搞到市民又話佢哋嘥錢，政助又發揮唔到自己嘅專長，真係都唔知為乜。