中環出更：李運強豪擲1400萬掃五良駒
唔少馬主過年期間飛咗去新西蘭卡拉卡（Karaka）出席當地嘅馬匹拍賣會，揀番隻良駒，拉多啲頭馬。先後擁有不下五十匹馬嘅理文造紙主席李運強都有去湊熱鬧，仲一口氣花千四萬港元購得五匹良駒，成隊兵咁款，其中一隻更以八十萬新西蘭元，即五百二十萬港元成交，成為全場第二最高拍賣價，連當地傳媒都爭相報道呢項盛事。
卓妮尋日喺沙田馬場見到李運強同太太孖住到場，二人剛剛去澳洲歎足十日，又去咗新西蘭買到五隻良駒，心情勁靚。李運強話，佢同太太及馬主朋友年初三已經飛咗去澳洲食吓龍蝦，探吓親友，初五就去卡拉卡嘅拍賣會買馬。
獲新西蘭報章報道
非常享受養馬嘅佢，喺拍賣會上豪擲千四萬港元，成功購入五匹駿馬，佢話價錢唔係問題，志在開心。講講吓，佢好興奮咁攞咗份《新西蘭先驅報》出嚟畀卓妮睇，原來該份報紙都刊登咗佢買馬呢段新聞。有咁多優質靚馬在手，卓妮祝佢未來繼續拉多啲頭馬啦！
卓妮