中環出更：名人攜家眷熱捧博愛盃

候任主席潘德明同太太及囡囡潘浠雯一早嚟到，潘德明話，兩個月前發現有耳鳴，睇咗三個專科醫生都話冇得醫。後來向博愛醫院中醫部求診，食咗幾劑中藥後已有好轉，遲啲仲會做針灸跟進，難怪佢話博愛嘅中醫服務確係一流。

四月將接任主席嘅潘德明（中），帶埋太太（右）及囡囡潘浠雯（左）齊撐場。	湯修齊（右）及太太Yvonne拍拖現身。（溫國佳攝）	陳李妮落注眼光奇準，認真係「橫財就手」。（余素月攝）

卓妮轉頭見到主席湯修齊（Henry），佢話年初四全家去咗泰國布吉避寒，揀初四出發係因為年初三例必去車公廟轉個好運，然後到荃灣圓玄學院食齋、拜太歲，呢個習慣自細養成，梗係喇！Henry爸爸係圓玄學院主席湯偉奇嘛！

陳李妮場場有錢收

前亞姐冠軍、博愛副主席陳李妮（Lily）同總理譚姜美珠聽Henry講起拜太歲，都話圓玄學院全港最靈，Lily仲喺圓玄拜太歲超過廿年添！正當傾到興起時，賽場內開閘笛響，Lily至醒起仲未落注，最終佢嘅心水馬真係跑出，靚女大呻走寶。不過隨後佢繼續受到財神眷顧，場場有錢收。Lily自爆已同老公聯名抽馬，希望夠運抽中做馬主，咁就可以做多啲善事喇！

博愛總理兼縱橫遊第二代接班人袁振寧，亦同太太林藹欣及大仔Cayden溫馨撐場，牙牙學語嘅囝囝好得意，氹到大家好開心。

卓妮