政情：教授話選特首 政綱認真過唐唐
又有人走出嚟想選特首喇！今次想參選嘅係一名學者，叫做余永賢，佢尋日就將自己份履歷同政綱發畀傳媒，明日仲會喺中環四季酒店舉行記者會添。余永賢份資料仲印有其競選辦公室嘅標誌，從種種迹象顯示，佢參選唔係講玩。
根據余永賢提供嘅簡歷顯示，佢係香港應用科技研究院顧問，曾經喺德國比勒菲爾德大學做教授，亦做過澳門大學校長高級顧問及澳門歐洲研究學會董事，又曾做過新加坡國立大學東亞研究所高級研究員，以及香港發展局助理總經濟師，來頭睇落唔小，分分鐘比某啲參選人仲好。
作為一位科學家，余永賢強調，特首必須帶領香港邁向知識型社會，仲提出「科教興港」嘅論述，要求促成技術類服務、倍增教學資源及大學學額等。雖然未知余永賢背後有冇星光熠熠嘅支持者，但從佢已經提出十七項治港政綱嚟睇，似乎比另一參選人唐英年仲要認真囉！