政情：立會四大懶蟲佗衰「加」
今年打工仔人工加幅中規中矩，臨近尾聲嘅現屆立法會議員亦密謀加薪，諗住前人種樹、後人享福。不過，唔加猶自可，一加就獅子開大口話要同問責局長人工掛鈎，要出局長一半人工，即是議員嘅月薪由七萬多元彈跳到十四萬元，加幅之大令人咋舌，搞到啲議員自己都有啲唔好意思，點解咁講？唔係因為佢哋嘅工作不及局長，而係被立法會四條大懶蟲拖累。
張文光唔忿氣
每屆立法會尾聲，立法會秘書處都檢討議員人工，有調整就交由政府嘅獨立委員會考慮。秘書處早前調查過其中三十八位議員嘅工作量，發現平均每人每周返工五十九個小時，有啲工作狂議員每周返工一百小時添，但亦有人只係返咗二十小時，即是一日返四小時，連兼職都不如。即使係咁，唔少議員都覺得做議員係全職工作，但依家份糧少得滯，建議最好加到局長嘅一半。
尋日立法會議員酬金及工作開支償還款額小組委員會上，白鴿黨張文光力撐要加議員人工至局長人工嘅四至五成，但講講吓，環顧會議室內只得佢、工黨主席李卓人及小組委員會主席劉慧卿開會，佢心感不忿兼愈講愈慶，話有乜理由要佢幫啲成日唔開會、返唔足工、又唔將議員視為全職工作嘅議員爭取加人工吖？人哥聽到亦忍唔住呻話，議員人工仲低過中學校長同老師。
其實張文光已經好厚道唔開名鬧啲大懶蟲議員，人所共知有幾條「大懶蟲」就係來自功能組別嘅金融界李國寶，體育、演藝、文化及出版界霍震霆，鄉議局主席劉皇發及中總代表黃宜弘，每年都輪流被批評唔開會，當然佢哋辯稱服務選民唔一定要個人坐喺立法會啦，誰是誰非相信自有公論。
不過，唔係個個功能組別議員都咁差嘅，好似進出口界「象哥」黃定光都埋怨咁多年要「帶埋銀紙做議員」，津貼唔夠使不在話下，就連份糧都要嘔凸，一諗起自己做生意嘅年代搵得多過依家多多聲，就慨嘆「生意唔撈兩頭遊」，做議員都唔知為乜喎。其實做得議員就要跟規矩做嘢，有會唔開點都講唔過去，如果淨係靠助理聽會，不如由助理做埋議員個位啦！