中環出更：雷添良掃紅酒 方文雄買金
新春團拜車輪轉，尋日轉到中華總商會，六百位政商界巨頭齊集灣仔君悅酒店，會長蔡冠深率領一眾高層向大家祝酒。一年之計在於春，大家少不免交換吓龍年投資新情報。歐債危機未除，樓市、股市如履薄冰，但任由銀紙貶值，唔划算，所以城中名人各有所好，有人買金、買人仔，亦有人選擇投資靚紅酒。
牛仔褲大王捧人仔
九巴後人兼羅兵咸永道會計師事務所合夥人雷添良（Tim）數口好精，經濟分析朗朗上口，佢預測本港經濟兇險，樓市將下調百分之十至十五，但依家未係買樓嘅好時機，不如趁機掃靚紅酒。Tim雷話，唔少著名酒莊佳釀近日開始跌價，名酒奇貨可居，如果下調多百分之十至二十，會飛身撲去掃貨。
中總副會長、協成行董事總經理方文雄（David）就教路買金，佢話歐美各國繼續印銀紙救市，銀紙一定貶值，反而買金仲穩陣。講到David家族最耍家嘅「磚頭」投資，佢坦言復建居屋對樓價有一定衝擊，認為市民置業唔使太心急。至於「牛仔褲大王」旭日集團董事長楊釗就繼續追捧人仔，預測今年升值百分之三，應該無難度喎。
講番中總團拜，今年依舊邀請煲呔曾主禮，由於佢就快「退伍」卸任，人氣已今非昔比，入場時已冇人拍掌歡迎，莫非大家期待新特首來臨？